1Ti 5 | NdeIBE | STEP | Ungamkhuzi ngolaka umuntu omdala, kodwa mncenge ngokungathi nguyihlo. Amajaha aphathe njengabafowenu,

1 Timothy 5

Izeluleko ngabafelokazi, labadala kanye lezigqili

1 Ungamkhuzi ngolaka umuntu omdala, kodwa mncenge ngokungathi nguyihlo. Amajaha aphathe njengabafowenu, 2 abesifazana abadala njengonyoko, abesifazana abatsha njengodadewenu, ngokuhlambuluka okupheleleyo.

3 Woba lonanzelelo olufaneleyo kubafelokazi abaswelayo kakhulu. 4 Kodwa uma umfelokazi elabantwana kumbe abazukulu, labo kumele bafunde kuqala kulakho konke ukusebenzisa ukholo lwabo ngokukhathalela abendlu yakwabo ngalokho besenanisa kubazali babo lakubazali babazali babo, ngoba lokhu kuyamthokozisa uNkulunkulu.

5 Umfelokazi oswelayo kakhulu njalo esele eyedwa ubeka ithemba lakhe kuNkulunkulu njalo aqhubeke ebusuku lemini ekhuleka ecela usizo kuNkulunkulu. 6 Kodwa umfelokazi ophilela intokozo ufile lanxa esaphila.

7 Banike labo abantu izeluleko lezi, ukuze angabi khona ongasoleka. 8 Uma umuntu enganakekeli izihlobo zakhe, ikakhulu abendlu yakwabo, uselulahlile ukholo lwakhe njalo mubi kakhulu kulongakholwayo.

9 Akulamfelokazi ozabekwa eluhlwini lwabafelokazi ngaphandle kokuba eseleminyaka edlula amatshumi ayisithupha, obengokade ethembekile kumkakhe, 10 njalo edumile ngezenzo zakhe ezinhle, ezinjengokondla abantwana, lokuphatha kuhle izihambi, lokugezisa izinyawo zabangcwele, lokusiza abahluphekayo kanye lokuzinikela kuzo zonke izenzo ezinhle.

11 Abafelokazi abasebatsha ungababeki eluhlwini olunjalo. Ngoba lapho izinkanuko zabo zomzimba sezikhulela ukuzinikela kwabo kuKhristu, bafuna ukwenda. 12 Ngalokho bazilethela ukwahlulelwa phezu kwabo, ngoba bephule isithembiso sabo sokuqala.

13 Langaphandle kwalokho, basuka babe lomkhuba wokuvilapha batshone benquma lezindlu. Njalo kababi ngamavila nje kuphela, kodwa bangabanyeyi labathandi bezindaba zabanye, besitsho izinto okungafanelanga bazitsho. 14 Ngakho, abafelokazi abasebatsha ngibacebisa ukuba bende, babe labantwana, baphathe izindlu zabo njalo banganiki isitha ithuba lokuba kube lokuhleba. 15 Abanye bavele sebedukile balandela uSathane.

16 Uma umuntu okholwayo elabafelokazi emzini wakhe, kumele abasize hatshi ukuyekela besinda ibandla, ukuze ibandla lisize abafelokazi abaswela kakhulu.

17 Abadala abaqhuba kuhle imisebenzi yebandla bafanele ukuhlonitshwa okuphindiweyo, ikakhulu labo abasebenza ukutshumayela lokufundisa. 18 Ngoba umbhalo uthi: “Inkabi ungayifaki isayeke lapho ibhula amabele,” njalo uthi, “Isisebenzi sifanele umholo waso.” 19 Ungalamukeli icala eletheswa umuntu omdala ngaphandle kokuba limangalwa ngofakazi ababili loba abathathu. 20 Abenza izono kumele bakhuzwe phambi kwabantu, ukuze labanye baxwayiseke.

21 Ngiyakulaya, phambi kukaNkulunkulu loKhristu uJesu lezingilosi ezikhethiweyo, ukuba ugcine iziqondiso lezi kungekho bandlululo, lokungenzi lutho ngokukhetha.

22 Ungaphangisi ukubeka izandla emuntwini, njalo ungahlanganyeli ezonweni zabanye. Zigcine uhlambulukile.

23 Yekela ukunatha amanzi kuphela, usebenzise lewayini elincane ngenxa yesisu sakho lokuhlala ugula.

24 Izono zabanye abantu zisobala, zifika endaweni yokwahlulela kuqala kulabo; kodwa abanye ezabo izono zilandela ngemuva kwabo.

25 Ngokufanayo izenzo ezinhle zisobala, njalo lalezo ezingenjalo azingeke zifihlwe.